上山學藝之杏汁雪影包+鴛鴦流沙奶皇包

  前兩日（星期一）又去左學中式點心，今次學兩款包⋯一款是蒸的、而另一款是焗的。

  首先講蒸的那款⋯鴛鴦流沙奶皇包。

  蒸好了！有得食^^

  跟著另一款是焗的⋯杏汁雪影包。

  首先呀Sir用一個好密好密的篩去隔左已打好的杏汁，咁樣個餡做出黎先夠滑的

  因為用剩有好多杏汁，所以呀Sir同場加影了蛋白杏仁露，巧潤呢～

豬肉餡餅

  本來早幾日就應該寫呢篇blog，不過因為大仔澳洲放暑假要番香港，當他不在港的期間我鵲巢鳩佔了佢間房，所以務必要在他回港前執好，真係執到死吓死吓！

  話說原本老公的意思係想食牛肉餡餅的，點知第二朝摷雪櫃原來只得豬肉、一條甘荀和一些急凍粟米粒，我又唔想再落街再買料，唯有叫老公將就D啦^皿^⋯

  其實做豬肉餡餅的材料好簡單，亦好隨意，今次我用的材料如下：

內餡材料：

1）豬絞肉      450g左右

      鹽               1.5 tsp

      水                 6 tbsp

     調味料：

     豉油             1.5 tbsp

     薑蓉              1 tsp

     麻油              3 tbsp

2）甘筍（切幼粒）      1條

3）急凍粟米粒             隨意

外皮材料：

1）中筋麵粉         400g

2）滾水                100g

3）冷水                150g

內餡做法：

1）先將豬絞肉打水，意思是將內餡材料內的鹽加入豬絞肉中攪勻

2）跟著將內餡材料內的水以少量多次方式加入絞肉中，以同一方向將水分確實攪入肉中，當水份未完全被肉吸收時，不可繼續加水

3） 當肉打水完成後，肉質具黏性，而顏色亦會變淡

4）肉打水後加入豉油，以同一方向將豉油攪入肉中，之後再加入薑蓉攪勻

5）最後才加入麻油拌勻，之後冷藏備用

外皮做法：

（今次是做半燙麵）

1）將滾水繞圏方式倒麵粉中，並不停攪拌麵粉和滾水，成鬆散的麵團狀

2）接着倒入冷水

3）將所有材料混合均勻，此時即成為濕黏麵團

4）取出濕黏麵團放在工作枱上，開始用手輕輕繼續搓柔，成麵團即可，蓋上保鮮膜放在室溫下鬆弛約30分鐘，即可將麵糰分割成23等份

完成以上步驟之後，便可以擀皮包餡，我次次都會包定多D，食幾多煎幾多，剩番果D會放入冰箱，留待遲D再食^^

上山學藝之棗皇糕+义燒酥

  尋晚又去學中式點心。

  第一樣係棗皇糕，其實呢樣喺今年過農曆年前已經學過，所以做法同上次一樣；唯一唔同嘅係上次用普通紅棗，食落有少少棗嘅酸味。而今次呀Sir用嘅係好大粒嘅新疆紅棗（呀Sir話貴好多架！），貴野即係貴野，整出黎嘅棗皇糕除了無左果D酸味之外，仲好香棗味添！正！

  而另一款要學嘅點心係义燒酥。通常酥皮嘅做法係水皮包油皮的，但今次呀Sir教嘅係剛剛相反，是用油皮包水皮，因為油皮好易溶，所以真係要快手快腳先得，否則真係會轆到一pat pat =_="....

上山學藝之灌湯餃+古法馬拉糕

  星期二晚去左上堂學中式點心，今次呢兩款就難整過上次好多了。

  首先是灌湯餃。嘩！真係估唔到咁真材實料，除了冬菇、竹笙、乾瑤柱⋯外，連魚翅都有！呀Sir話如果要去佢地果度食，一隻都要$14X，今堂真係賺晒Lu~

  因餡料要預早整定，所以呀Sir已經為我地準備好⋯

  跟住就係搓皮、開皮。呢個步驟雖然做得唔夠呀Sir咁靚，但是我地都可以勉強handle到嘅⋯

  咪以為兩塊嘅size點解相差咁遠，因為D皮要分兩次開的。較細的是第一次開皮，較大的是完成第一次開皮，待鬆馳後再開。

  最後要包就真是無辦法喇，真係超難！差不多全部都係要呀Sir包晒：（

  因為想回家同老公分享，所以拎番屋企先蒸熟佢黎食（＾Ｏ＾）

  另一款點心就是古法馬拉糕，做法當然比坊間的較複雜啦！因為首先淨係做個麵種都要準備7日，有了麵種後再加入某些材料又再發酵⋯總之全個過程由零開始要到第10日才有得食。所以以後去飲茶食各樣點心真係要加倍珍惜！

上山學藝之皮蛋酥+炸粉果

  尋晚去左上堂學中式點心，今次呀Sir教整皮蛋酥同炸粉果。兩款都唔太難整，所以可以比預期早點放學。

  首先是皮蛋酥。講真，因我以前不喜歡食皮蛋，所以我真的從來未試過這款食物。但印象中的皮蛋酥（嫁女餅果款）是酥皮包着完隻皮蛋的。而今次學整的卻是將皮蛋切成小粒，再用蓮蓉包住，最後才包上酥皮去焗，可能這是點心的做法呱？！

  焗完後的成品⋯

  接著就是上湯炸粉果的那款炸粉果了，當然昨晚是走上湯的😁

  首先炒好材料⋯

  然後搓好個皮⋯

  跟住就可以包喇～

  包好拎去炸，炸好襯熱食，正！