上山學藝之灌湯餃+古法馬拉糕

  星期二晚去左上堂學中式點心，今次呢兩款就難整過上次好多了。

  首先是灌湯餃。嘩！真係估唔到咁真材實料，除了冬菇、竹笙、乾瑤柱⋯外，連魚翅都有！呀Sir話如果要去佢地果度食，一隻都要$14X，今堂真係賺晒Lu~

  因餡料要預早整定，所以呀Sir已經為我地準備好⋯

  跟住就係搓皮、開皮。呢個步驟雖然做得唔夠呀Sir咁靚，但是我地都可以勉強handle到嘅⋯

  咪以為兩塊嘅size點解相差咁遠，因為D皮要分兩次開的。較細的是第一次開皮，較大的是完成第一次開皮，待鬆馳後再開。

  最後要包就真是無辦法喇，真係超難！差不多全部都係要呀Sir包晒：（

  因為想回家同老公分享，所以拎番屋企先蒸熟佢黎食（＾Ｏ＾）

  另一款點心就是古法馬拉糕，做法當然比坊間的較複雜啦！因為首先淨係做個麵種都要準備7日，有了麵種後再加入某些材料又再發酵⋯總之全個過程由零開始要到第10日才有得食。所以以後去飲茶食各樣點心真係要加倍珍惜！

Midnight Express 1019

  老公與同事參加左一個Midnight Express 1019的活動，而我做佢地嘅support term。

  今晚要準備點晚餐帶去某指定地方等他們，因為要行很長的時間，所以我多做了兩個包包，希望他們行到半夜三更肚餓的時候有小小食物可以充飢。

  首先是南瓜提子包，今次加了從日本帶回來的南瓜蔬菜粉⋯

  南瓜提子包材料：

高粉            150g

南瓜蔬菜粉   15g

無水酵液       38g

鮮奶              95g

糖                 10g

鹽                1.5g

無鹽牛油        8g

提子乾          30g

  另外一個是用粟米蔬菜粉做的粟米肉鬆包⋯

粟米肉鬆包材料：

高粉            150g

粟米蔬菜粉     8g

無水酵液       38g

鮮奶              90g

糖                 10g

鹽                1.5g

無鹽牛油        8g

肉鬆             適量

  今次都係用低溫慢烤的方法，焗完出黎個包外脆內軟⋯

  又或者係今朝大約5：00左右就比人嘈醒了，醒後一直去整包無食過野，所以實在太肚餓，個肉鬆包一出爐就忍唔住食了大半，食食下先記得未影相，因此⋯

  

  哈哈～ 呢個就係我剛剛食剩的肉鬆包

^皿^"⋯⋯好彩仲有時間再去整多個比老公今晚食⋯⋯即刻去再開工先！

上山學藝之皮蛋酥+炸粉果

  尋晚去左上堂學中式點心，今次呀Sir教整皮蛋酥同炸粉果。兩款都唔太難整，所以可以比預期早點放學。

  首先是皮蛋酥。講真，因我以前不喜歡食皮蛋，所以我真的從來未試過這款食物。但印象中的皮蛋酥（嫁女餅果款）是酥皮包着完隻皮蛋的。而今次學整的卻是將皮蛋切成小粒，再用蓮蓉包住，最後才包上酥皮去焗，可能這是點心的做法呱？！

  焗完後的成品⋯

  接著就是上湯炸粉果的那款炸粉果了，當然昨晚是走上湯的😁

  首先炒好材料⋯

  然後搓好個皮⋯

  跟住就可以包喇～

  包好拎去炸，炸好襯熱食，正！

無水酵母紫芋包

  整麵包真係好多學問、好有趣，單單是酵母已經有好多種類。今次嘗試養無水酵母來整包包。

  隨手拎左細仔食緊嘅無核提子30粒，跟住將D提子一開二⋯

  放入已消毒的玻璃樽內，再隨意的加了點糖⋯

  跟住篤佢幾下，希望做出黎可以多D酵液⋯

  接著就係等⋯

  ⋯等到第2日⋯開始有D水出,仲有少少吱吱聲添⋯繼續等⋯

  ⋯到了第4日已經開始多泡泡⋯

  ⋯等到第5日泡泡明顯多左好多⋯

  見到有咁多泡，於是嘗試用直接法來整包，點知收集起來的酵液只得29g！無法啦～ 唯有加一點點的速酵母吧！今次還加了點從日本買回來的蔬菜粉⋯

無水酵母紫芋包

材料：～

高筋粉        150g

紫芋粉            5g

無水酵母液   29g

速酵母         0.7g

全脂牛奶      72g

水                 12g

三溫糖          10g

海鹽             1.5g

無鹽牛油      7.5g

  沒有特別的做型，只是滾圓吧了！平均分割了5個小圓球，臨入爐前噴點水、灑點麥皮而已⋯

  今次用較低溫去焗，因為不想個包焗到太深色。但結果都比我想象中還是深了點色。

  首先是140度焗10分鐘，接著是160度焗8分鐘，最後用180度焗了3分鐘,出爐了⋯

  幸好包包的質感還不錯，我和老公即刻每人食了一個，淨了那3個留待他今晚去行夜山肚餓時充饑～

有柑汁

  話說昨天有5個C9無啦啦講起晒果皮，於是戚起條根即刻揸車去果欄買左兩箱新會柑，然後每人分D番屋企整，我分左50個⋯

  首先，將D柑續個用濕布抹乾淨，抹完塊布都變黑色了，你話幾污穢呢～

  然後喺個柑上界個"Y"字，再慢慢取走柑肉，我會一次過界晒先再取走柑肉⋯

  最後，串起成串諗出窗曬⋯

  聽人講有太陽就曬，太陽下山要收返啲果皮入屋，果皮唔可以打霧水的，否則就會好容易發霉。串果皮係正反正反咁串，因為如果同一方面串, 曬曬下好可能重疊左, 重疊位置好易曬唔透又會發霉，希望我果D可以順順利利啦！

  D果皮暫時就攪掂喇！但D果肉點算呢？唔要？又好似好浪費啫！於是，我用慢磨機榨左汁。嘩～原來50個咁細嘅柑，榨左出黎都有3公升柑汁架！

我咁錫我老公，梗係第一時間斟一大杯比佢試飲先啦！可能佢感受到我嘅誠意，即刻好快咁飲晒，於是我問佢味道如何，佢話唔酸、無乜甜味，但有D澀，都可以飲到嘅⋯

   哈哈～ 真抵錫！

  仲有3公升等緊你架⋯嘿嘿嘿⋯

測試

第一次用Blogger，試下放張可愛的小龍貓袋比大家睇下先^^^