芋頭糕

  芋頭糕是我大仔的至愛，由其是煎香之後，更加美味，所以每年都會一定整給他吃的^_^

材料 ： -

芋頭                 600g (1斤）切粒

臘腸                     2條

臘肉                    半條（因為我屋企唔食，所以無落，改加多一條臘腸）

乾瑤柱                適量

蝦米                    適量

冬菇                  4~6隻  （留起浸冬菇的水250ml）

粘米粉               160g

澄麵                       1tbsp (因為芋頭是粉粉的，加了澄麵可令到糕身爽身一點）

水                   1,000ml （其中浸冬菇的水250ml已包括在內）

調味料： -

雞粉                      1tsp

鹽                          1tsp

糖                          1tsp

五香粉                3/4tsp

胡椒粉                1/2tsp

麻油                      少許

做法 ： -

 

1）首先爆香D臘腸、蝦米、乾瑤柱、冬菇先，盛起備用。（我無落油呀，因為臘腸自己已經會出油喇！）

2）原鑊再落適量嘅油爆一爆d芋頭，今次我唔係將個芋頭全部切粒，而係大約一大碗份量嘅芋頭切條，其餘嘅先至切粒，點解咁？！因為我諗住食落有一條條芋頭條，＂好似＂好味D囉！

     就係因為咁，所以要分兩次爆香D芋頭，首先爆香D芋頭條，盛起備用。

3）然後就再落適量嘅油，再爆香D芋頭粒。

4）爆香芋頭粒後，隨即倒埋之前已爆香嘅臘腸、冬菇、蝦米，再炒一陣。

5）加入250ml浸冬菇的水同埋所有調味料，點解唔係加清水？其實係可以用晒清水架，不過加＂冬菇水＂會香D囉~   

6）待水滾後熄火蓋上鑊蓋焗15~30分鐘，好讓所有材料入味。

7）就喺呢個時候，將粘米粉和澄麵加入250ml清水攪勻。

8）焗完後，將芋頭料用大火煮滾，再加入餘下的500ml清水（我今次加了浸乾瑤柱、蝦乾的水），和之前盛起的一碗芋頭條（或芋頭粒），煮至大滾。

9）然後改細火，再加入已攪勻的粉漿，攪勻所有芋頭料至杰身。

10）跟住將芋頭料倒入已搽上油的盆內，蒸大約一小時。

11）初蒸起時糕身好軟架！所以至少要放涼5小時以上先可以切件呀！